കന്നഡ ഹൊറർ ചിത്രം ‘രുധിർവന’ ഉടൻ തിയേറ്ററുകളിൽ

കന്നഡ ഹൊറർ ചിത്രം ‘രുധിർവന’ ലോകമെമ്പാടുമുള്ള തിയേറ്റർ റിലീസിനൊരുങ്ങുന്നു. “Haunted by the past Hunted by the present” എന്ന ടാഗ്‌ലൈനോടൊപ്പം പുറത്തിറങ്ങിയ ചിത്രത്തിന്റെ പുതിയ പോസ്റ്റർ, പ്രേക്ഷകരെ കാത്തിരിക്കുന്നത് വേട്ടയാടുന്ന വനദേവതയുടെ ഭീതിജനകമായ ലോകമാണെന്ന സൂചന നൽകുന്നു.

നവാഗതനായ അഗ്നി രചനയും സംവിധാനവും നിർവഹിക്കുന്ന ചിത്രം, രക്തത്തിൽ കുതിർന്ന കാട്ടിനുള്ളിൽ അകപ്പെട്ടുപോകുന്ന ആറ് തിരഞ്ഞെടുപ്പ് ഉദ്യോഗസ്ഥരുടെ അതിജീവന പോരാട്ടമാണ് പറയുന്നത്. നാടോടി വിശ്വാസങ്ങളും ഹൊററും സർവൈവൽ ത്രില്ലറിന്റെ ഘടകങ്ങളും സമന്വയിപ്പിക്കുന്ന ചിത്രമെന്ന പ്രത്യേകതയും ‘രുധിർവന’യ്ക്കുണ്ട്.

IFFI ഗോവ 2025-ലെ സോൾഡ്-ഔട്ട് ഗാല പ്രീമിയർ ചിത്രത്തിന് ശ്രദ്ധേയമായ തുടക്കമാണ് സമ്മാനിച്ചത്. ചലച്ചിത്രമേളയിലെ പ്രദർശനത്തിന് പിന്നാലെ, ഇപ്പോൾ ചിത്രം ബിഗ് സ്‌ക്രീനിലേക്കുള്ള യാത്രയ്ക്കാണ് ഒരുങ്ങുന്നത്.

ദക്ഷിണ കന്നഡയിലെ ചെറിയ ഗ്രാമമായ നെല്ല്യാടിയിൽ നിന്നുള്ള അനുപം കെ. ജോർജ്ജ് ചിത്രത്തിന്റെ നിർമ്മാതാക്കളിൽ ഒരാളാണ്. നിർമ്മാതാവാകുന്നതിന് മുമ്പ് മലയാള ചലച്ചിത്ര വ്യവസായത്തിൽ അസിസ്റ്റന്റ് ഡയറക്ടറായി (AD) പ്രവർത്തിച്ചിരുന്ന അനുപം, ഇപ്പോൾ Nantara Productions എന്ന ബാനറിലൂടെ സ്വതന്ത്ര കന്നഡ സിനിമകൾക്ക് പിന്തുണ നൽകുകയാണ്.

POV Pictures & Nantara Productions-ന്റെ ബാനറിൽ പ്രിയങ്ക ഭുവനേന്ദ്ര, അനുപം കെ. ജോർജ്ജ്, പ്രദീപ് മൽഹർ എന്നിവർ ചേർന്നാണ് ‘രുധിർവന’ നിർമ്മിച്ചിരിക്കുന്നത്.

പാവന ഗൗഡ, പ്രിയ ശതമർഷൻ, ബാല രാജ്‌വാദി, കൃഷ്ണ ഹെബ്ബാലെ, അർജുൻ കജെ, അവിനാഷ് റായ്, അപ്പോർവ എന്നിവർ പ്രധാന വേഷങ്ങളിലെത്തുന്നു.

കാട് വിളിക്കുന്നു. ഭയം കാത്തിരിക്കുന്നു.‘രുധിർവന’ വരുന്നു.